Tuesday, July 21, 2009

ദൈവത്തിനെക്കുറിച്ച് ഒരു കവിത

ഉറങ്ങുകയായിരുന്നു ഞാന്‍
അമ്മയുടെ മടിയിലെന്ന പോലെ,
തണുപ്പിന്‍റെ കരലാളനങ്ങളേറ്റ്...
നിശയുടെ പുതപ്പിനുള്ളില്‍.

നിദ്രയുടെ സമതലങ്ങളിലൂടെ
ഒരു കുട്ടിയെപ്പോലെ അലഞ്ഞു തിരിയവേ;
സ്വപ്നങ്ങളുടെ ചക്രവാളത്തില്‍
ഒരു കവിത ചന്ദ്രനായ്‌ ഉദിച്ചുവന്നു.

ദൈവത്തിനെക്കുറിച്ച് ഒരു കവിത
ജീവിതം മണക്കുന്ന ഒരു കവിത
ഓരോ വരികളും ഓരോ മതങ്ങള്‍
അക്ഷരങ്ങള്‍ക്കു പകരം
ആചാരങ്ങള്‍ , അനുഷ്ഠാനങ്ങള്‍,
ജപമാലകള്‍, പ്രാര്‍ത്ഥനകള്‍...

കൗതുകമുണര്‍ന്ന മിഴികളോടെ,
ഓരോ വരിയും ഞാന്‍ നോക്കിനിന്നു.
ഒന്നു സ്പര്‍ശിക്കാനുള്ള ആശ
ശാസനകളുടെ ചുവരുകള്‍ക്കുള്ളില്‍
വേദനയുടെ കാവലിലടച്ച്‌,
ഞാന്‍ ഹൃദയത്തിലൊതുക്കി

ഒടുവില്‍ ഞാന്‍ ചുവരുകള്‍ക്കുള്ളില്‍ നിന്ന്
പുറത്തുവന്ന് ഒന്നു തൊടാനാഞ്ഞപ്പോള്‍
എല്ലാം ശൂന്യം .....
സ്നേഹത്തിന്‍റെ പനിനീര്‍ഗന്ധം മാത്രം
എനിക്കു ചുറ്റിലും...
നിര്‍വൃതിയോടെ ഞാന്‍
സ്വയം മറന്നുനിന്നു.

ഉറക്കമുണര്‍ന്നപ്പോള്‍ ഞാന്‍ വീണ്ടും
വേദനയുടെ ലോകത്തില്‍
അശരണനായി കിടന്നു.