Wednesday, May 20, 2009

വര്‍ണ(അ)ഭേദങ്ങള്‍

കറുപ്പും, വെളുപ്പും
ഒരിക്കല്‍ തര്‍ക്കത്തില്‍ ഏര്‍പ്പെട്ടു;
സ്വമഹിമയെക്കുറിച്ച്.

കറുപ്പ് പറഞ്ഞു;
ആദിയാണ് ഞാന്‍ ,
അന്ത്യവും
ഞാന്‍ തന്നെ.
എല്ലാം എന്നില്‍ നിന്നുടലെടുത്ത്,
എന്നിലവസനിക്കുന്നു,
പ്രപഞ്ചം
പോലും .

വെളുപ്പു
തര്‍ക്കിച്ചു;
ഞാനാണ്
ജീവിതം,
ഞാന്‍ പ്രതീക്ഷയാണ്.
എന്നില്‍ നിന്നുടലെടുത്തതോ
വര്‍ണ്ണവെറിയത്രേ.

കറുപ്പ് ചോദിച്ചു:
മാന്യതയുടെ , സദാചാരത്തിന്‍റെ,
അന്തസ്സിന്‍റെ മുഖം മൂടിയല്ലേ നീ ?

വെളുപ്പു
വിട്ടുകൊടുത്തില്ല,
അവര്‍ണനും,അധ:കൃതനും,
ദളിതനുമല്ലേ
നീ ?
കൊളോണിയല്‍ ഇസത്തിന്‍റെ ,
അധിനിവേശ സംസ്കാരങ്ങളുടെ
ചാവാത്ത ഇരയാണ് നീ .

തര്‍ക്കം അവിരാമമാകവേ,
എന്തറിയുന്നൂ
നിങ്ങള്‍ ?
കറുപ്പിനവസാനമാണ് വെളുപ്പെന്നോ,
അതോ
മറിച്ചോ ?

ആരംഭവും ഇപ്രകരമാവാം ;
പക്ഷെ , ആലോചിക്കൂ
കറുപ്പല്ലേ വെളുപ്പിനെ സൃഷ്ടിച്ചത് ?
വെളുപ്പു കറുപ്പിനേയും .